Өңірлік кеңес стратегиялық бағыттарды айқындады
Астана қаласының Кәсіпкерлер палатасы алаңында елордадағы бизнес-ортаны жақсартуға қатысты негізгі мәселелер талқыланған Өңірлік кеңестің отырысы өтті. Кездесу барысында қатысушылар алдағы жылдарға арналған жұмыс бағыттарын белгіледі, сондай-ақ 2025 жылғы Наурыз мейрамына дайындыққа ерекше назар аударды.
Отырыстың күн тәртібіндегі басты мәселелердің бірі – 2025-2026 жылдарға арналған Өңірлік кеңестің жұмыс жоспарын бекіту болды. Кеңес төрағасы Александр Подвалов өз баяндамасында стратегиялық бағыттарды айқындап, Астанадағы кәсіпкерлікті жүйелі түрде дамыту маңызды екенін атап өтті. Кеңес мүшелері ұсынылған бастамаларды қолдап, өзекті мәселелерді талқылап, конструктивті ұсыныстарын білдірді. Келісілген және дәйекті жұмыс алға қойылған мақсаттарға қол жеткізіп, елордалық бизнестің бәсекеге қабілеттілігін арттыруға мүмкіндік беретіні атап өтілді.
Отырыста қаралған тағы бір маңызды тақырып – Наурыз мейрамына дайындық. Қатысушылар мерекелік іс-шаралар жоспарын талқылап, бизнес-қоғамдастықтың мерекені ұйымдастыруға белсенді қатысуының жаңа форматын ұсынды. Дәстүрлі түрде бұл мейрам адамдарды біріктіреді, ал оны жоғары деңгейде өткізу кәсіпкерлер мен қоғам арасындағы серіктестікті нығайтуға тағы бір қадам болмақ. Алдағы Наурыз мерекесінің ерекшелігі – оның Мемлекет басшысы Қасым-Жомарт Тоқаев жариялаған Жұмысшы мамандықтар жылы аясында өтетіндігі. Мереке қарсаңында құрылысшылар, инженерлер, өндіріс шеберлері, қызмет көрсету саласының мамандары және басқа да салалардың үздік өкілдерін марапаттау жоспарлануда. Кеңес мүшелері ел экономикасының дамуына елеулі үлес қосып жүрген мамандардың еңбегін бағалау мақсатында салтанатты іс-шара өткізу бастамасын қолдады.
Кәсіпкерлер палатасының директоры Қанат Әлин командасының белгіленген міндеттерді іске асыруға дайындығын білдіріп, тұрақты экономикалық өсуді қамтамасыз ету үшін күш-жігерді біріктіру маңызды екенін атап өтті. Оның пікірінше, ашық диалог пен нарық қатысушыларының бірлескен жұмысы кәсіпкерлікті қолдаудың тиімді жүйесін құруға көмектеседі.
Өңірлік кеңестің отырысы бизнес-қоғамдастықтың өзекті мәселелерді шешуге жоғары деңгейде атсалысып отырғанын көрсетті. Қабылданған шешімдер елорданың кәсіпкерлік ортасын дамытуға және оның инвестициялық тартымдылығын арттыруға негіз болады. Сондай-ақ алдағы Наурыз мейрамына арналған іс-шаралар жұмысшы кәсіптердің маңыздылығын мойындау және еңбекке деген құрметті нығайту жолында маңызды қадам болмақ.
Пікір қалдыру:
Пікірлер: